संविधानसभाको उपाध्यक्षमा माओवादीकी पूर्ण सुवेदी
संविधानसभाको उपाध्यक्षमा नेकपा माओवादीकी पूर्ण कुमारी सुवेदी निर्वाचित हुनुभएको छ । संविधानसभाको आजको बैठकमा मतविभाजनको आधारमा भएको निर्वाचनमा उहाँले संविधानसभामा उपस्थित पाँच सय पाँच सदस्यमध्ये तीन सय छयालिस मत प्राप्त गर्नुभएको थियो । उहाँको विपक्षमा उनानसत्तरी मत परेको थियो भने नब्बे मत तटस्थ रहेको थियो । माओवादीकी उम्मेदवार सुवेदीलाई नेकपा एमाले, जनमोर्चा नेपाललगायतका दलको र्समर्थन रहेको थियो । संविधानसभाको उपाध्यक्ष पदमा निर्वाचित पचास वषीया पूर्णकुमारी सुवेदी माओवादी जनयुद्धका क्रममा मध्यपश्चिम र हिमाली क्षेत्रमा नेतृत्वदायी भूमिकामा हुनुहुन्थ्यो भने यसअघिको अन्तरिम व्यवस्थापिका संसदको सदस्य हुनुहुन्थ्यो । एक जुझारु महिलाका रुपमा परिचित सुवेदी संविधानसभा निर्वाचनमा बाँके क्षेत्र नम्बर चारबाट निर्वाचित हुनुभएको हो ।नेकपा मालेका तर्फाट उम्मेदवारी दिनुभएकी निलम केसीले पनि आफ्नो उम्मेदवारी फिर्ता लिई सुवेदीलाई नै र्समर्थन गर्नुभएको थियो । यसअघि मत विभाजनका आधारमा भएको निर्वाचनमा राप्रपाकी प्रतिभा राणा, सद्भावनाका खोभारी राय, नेपाल मजदुर किसान पार्टी लिला न्याइँच्याइँ पराजित हुनुभएको थिायो । यसअघि नेपाल मजदुर किसान पार्टी लिला न्याइच्याईलाई निर्वाचित गरियोस् भन्ने प्रस्तावमा मतदान हुँदा उपस्थित संख्या 593 मा पक्षमा 115, विपक्षमा 217 र 175 मत तटस्थमा परेको थियो । यसअघि संविधानसभा बैठकमा सद्भावनाका खोभारी राय र राष्ट्रिय प्रजातन्त्र पार्टी प्रतिभा राणालाई निर्वाचित गरियोस् भन्ने प्रस्ताव बैठकमा अस्वीकृत भएको थियो । सद्भाभावनाका खोभारी रायको प्रस्तावमा मतदान हुँदा उपस्थित सदस्य संख्या 516मा पक्षमा 8 मत परेको थियो । विपक्षमा 231 मत परेको थियो । 277 मत तटस्थ रहेको थियो । यसैगरी मत विभाजनका आधारमा भएको निर्वाचन परिणामअनुसार उपस्थित सदस्य संख्या 528 मा राप्रपाकी राणाको पक्षमा 114, विपक्षमा 231 र 183 मत तटस्थमा परेको थियो । माओवादीकी पूर्ण कुमारी सुवेदी निर्वाचित भएपछि बाँकी उम्मेदवार रमणी रामलाई निर्वाचित गरियोस् भन्ने प्रस्ताव बैठकमा प्रस्तुत भएन । संविधानसभा उपाध्यक्षका लागि दलहरुबीच सहमति बन्न नसक्दा निर्वाचन प्रक्रियामार्फ उपाध्यक्षको चयन भएको हो ।
गृह पृष्ठ
