शान्तिमन्त्री जनकपुरमा
शान्ति मन्त्री तथा तराईका सशस्त्र समूहसँग वार्ता गर्न सरकारले बनाएको समितिका संयोजक जनार्दन शर्मा अचानक जनकपुर पुगेका छन् ।
हतियारधारी समूहहरुसँग वार्ता गर्न सरकारले वनाएको वार्ता समितिका संयोजक जनार्दन शर्मा मंसिर १ गते अचानक जनकपुर आएका छन् । तराईका सशस्त्र भूमिगत संगठन र सरकारी वार्ता समितिबीच वार्ता प्रक्रिया अघि बढिरहेकोबेला शर्माको आकस्मिक जनकपुर भ्रमणलाई अर्थपूर्ण तथा वार्ताकै लागि मानिएको छ ।
राजधानीबाट जनकपुर आएको बुद्ध इयरको बिमानबाट उत्रेका मन्त्री शमाले संचारकर्मीहरुसँग कुरा गर्न नचाहनुले पनि उनको जनकपुर भ्रमण बेशी अर्थपूर्ण बनेको हो । संचारकर्मीहरुको आग्रहपछि उनले मधेश घुम्न आएको प्रतिक्रिया दिए । ‘मधेशको स्थिती बुझ्न र निरिक्षण गर्न आएको हुँ’ मन्त्री शर्माले भने । उनीसँग तीन जना अंगरक्षक मात्र जनकपुर आएका छन् । जनकपुरस्थित सुरक्षाकर्मीहरुका अनुसार, मन्त्री आउने जानकारी उनीहरुलाई आज बिहान मात्र प्राप्त भएको थियो । मन्त्री शर्माको आज जनकपुरमै बस्ने कार्यक्रम रहेको छ ।
हिमालखबर डट कम
गृह पृष्ठ
