‘माधव नेपाल राष्ट्रपति पक्का’
राजनीतिक सहमतिका निम्ति प्रधानमन्त्री निवास बालुवाटारमा छलफल जारी रहेको बेला एमाले स्थायी समिति सदस्य बामदेव गौतमले माधव नेपाल मुलुकको राष्ट्रपति हुने पक्का भएको बताएका छन् ।
एमाले स्थायी समिति सदस्य बामदेव गौतमले आफ्नो पार्टीका निवर्तमान महासचिव माधवकुमार नेपाल मुलुकको राष्ट्रपति हुने ९९ प्रतिशत पक्का भइसकेको बताएका छन् । राजधानीमा असार ७ गते रिपोर्टस क्लबले आयोजना गरेको अन्तक्रिर्या कार्यक्रममा बोल्दै नेता गौतमले मुलुकको नेतृत्व अब सुधारवादी नेपाली कांग्रेसको साटो अग्रगामी एमालेले गर्ने दावी गरे । संविधानसभा चुनावमा हारे पनि नेपाल बिधायिकाको बिश्वास प्राप्त गरेर राष्ट्रपति हुने भएकाले चुनावमा हारेको बिषयले कुनै अर्थ नराख्ने कार्यक्रममा उनले उल्लेख गरे ।
कार्यक्रममा बोल्दै माओवादी सचिवालय सदस्य मोहन बैद्य किरणले आफ्नो पार्टी एमालेसँग सहमतिको निकै निकट पुगेको जानकारी दिए । कांग्रेसलाई आफ्नो पार्टीले बिश्वास गर्न नसक्ने भएकाले प्रधानमन्त्री गिरिजाप्रसाद कोइरालालाई राष्ट्रपति मान्न नसकिने पनि उनको भनाइ थियो । कार्यक्रममा उनले बिदेशी हस्तक्षेप नभएको भए मुलुकमा पहिले नै जनवादी गणतन्त्र आइसक्ने थियो भन्ने दावी गरे । आफ्नो पार्टीले सुरु गरेको १० वर्षे जनयुद्धको लक्ष निकै नजिक रहेको तथा राजनीतिक सहमति गरेर अघि जानुको बिकल्प नरहेको पनि कार्यक्रममा बैद्यले उल्लेख गरे ।
मधेशी जनअधिकार फोरमका अध्यक्ष उपेन्द्र यादवले मधेशका मुद्धा सम्वोधन भए नयाँ सरकारमा आफ्नो पार्टी जाने तथा सरकारमा जान आफ्नो पार्टीलाई कुनै हतार नभएको बताए।
हिमालखबर डट कम
गृह पृष्ठ
