सात राजनीतिक पार्टी र नेकपा (माओवादी) बिच शिर्ष बार्ता सुरु
काठमाण्डौ २२ असोज
सात राजनीतिक पार्टी र नेकपा (माओवादी) नेतृत्वबीच अहिले बिहान ९ बजेदेखि शिर्ष वार्ता प्रारम्भ भएको छ। वार्ता प्रधानमन्त्री निवास बालुवाटारमा चलिरहेको छ।
वार्तामा प्रधानमन्त्री तथा नेका सभापति गिरिजाप्रसाद कोइराला, गृहमन्त्री कृष्णप्रसाद सिटौला, आमोद उपाध्याय र महेश आचार्यले नेकाको तर्फबाट भाग लिएका छन् भने एमालेको तर्फबाट महासचिव माधवकुमार नेपाल, भरतमोहन अधिकारी, झलनाथ खनाल र पर्यटन मन्त्री प्रदीप ज्ञवालीको उपस्थिति रहेको छ त्यस्तै माओवादीबाट अध्यक्ष प्रचण्ड, वरिष्ठ नेता डा. बाबुराम भट्टराई, रामबहादुर थापा (बादल) र कृष्णबहादुर महराको सहभागिता रहेको छ। माओवादी नेताहरु कालो सिसा भएको गाडीमा आएको थिए भने उनिहरुलाई माओवादीकै दुई भ्यान सुरक्षाकर्मिहरुले पछ्याएर आएका थिए।
बार्तामा सहभागी हुन प्रजातान्त्रिक काङ्ग्रेसबाट पार्टी सभापति शेरबहादुर देउवा, डा. मीनेन्द्र रिजाल र श्रम राज्य मन्त्री रमेश लेखकको उपस्थिती रहेको छ। त्यस्तै मजदूर किसान पार्टीका अध्यक्ष नारायणमान विजुक्छे, सद्भावना (आनन्दीदेवी) को तर्फबाट आपूर्ति मन्त्री हृदयेश त्रिपाठी, उपाध्यक्ष भरत विमल यादव र राजेन्द्र महतो लगायत अन्य वाम पार्टीका नेताहरुको पनि वार्तामा सहभागिता रहेको बालुवाटार स्रोतहरुले बताएका छन्।
संविधानसभा, राज्यको पुनः संरचना, राजतन्त्र, हतियार व्यवस्थापन लगायतका विषयमा छिनोफानो गर्नुपर्ने भएकोले वार्ता आज टुङ्गिन नसक्ने बताएका थिए। बालुवाटार छिर्ने क्रममा नेकपा (एमाले)का महासचिबले भने, “वार्ता भोलि पनि हुनेछ। र पर्सि मात्र वार्ताका उपलब्धीहरुलाई सार्वजनिक गरिनेछ।”
दशैँ अघि नै हुने भनिएको शिखर वार्ता स्थगित भएको थियो। हिजो पनि हिमालय होटलमा प्रचण्डसहित सरकारी वार्ता टोलीका सदस्यहरु र पार्टीका नेताहरुबीच अनौपचारिक छलफल भएको थियो। र प्रम कोइराला र अध्यक्ष प्रचण्डबीच अनौपचारिक रुपमा कुराकानी भएपछि आजको वार्ता तय भएको थियो।
बिस्तृत समाचार पछि
गृह पृष्ठ
