बिमा संस्थान लुट्ने प्रयास
काठमाडौं, कार्तिक ८
रामशाहपथस्थित राष्ट्रिय बिमा संस्थानमा मंगलबार लुटपाट गरेर भागिरहेका अवस्थामा एक युवक हतियारसहित पक्राउ परेका छन् । प्रहरीका अनुसार दिउँसो डेढ बजेतिर भक्तपुर-११ भेलुखेल घर बताउने राजेश देउला पक्राउ परेका हुन् । उनले संस्थानका क्यासियर ठाकुरप्रसाद पाण्डेलाई ज्यान मार्ने धम्की दिँदै काउन्टरबाट १ लाख ९० हजार रुपैयाँ लुटेका थिए । नगद लिएर बा१८प ७४२७ नम्बरको मोटरसाइकलमा भाग्न लागेका उनलाई गेटमा नपुग्दै सुरक्षा गार्ड र संस्थानका कर्मचारीले पक्रेका थिए ।
सुरक्षा गार्ड खेमराज अधिकारीले ढुंगा प्रहार गरेपछि ३१ वर्षीय देउला मोटरसाइकलबाट लडेका थिए । घटनास्थलमा तत्काल पुगेको सिंहदरबार प्रहरीले उनलाई नियन्त्रणमा लिएको थियो ।
भाग्ने क्रममा लुटेराले चलाएको गोली लागी अर्का सुरक्षा गार्ड बयानबहादुर कार्की सामान्य घाइते भएका छन् । बायाँ घुँडामा चोट लागेका उनको वीर अस्पतालमा उपचार भइरहेको छ ।
देउलाबाट लुटिएको रकम, इटालियन लेखिएको घरेलु निर्मित पेस्तोल, दुई थान पेन गन र १४ राउन्ड गोली बरामद गरेको प्रहरीले जनायो । काठमाडौंका डीएसपी गणेश केसीका अनुसार देउलाले आठ राउन्ड गोली मोजामा लुकाएका थिए । बरामद भएको छ राउन्ड गोली पेन गनको र ८ राउन्ड गोली पेस्तोलको भएको प्रहरीले जनाएको छ । देउलाले ती हतियारहरू विराटनगरबाट ल्याएको बयान दिएका थिए ।
गृह पृष्ठ
