राजाको सवारीका निम्ति जहाज किनिने
श्री ५ महाराजाधिराज तथा श्री ५ बडामहारानीको विदेश भ्रमणका लागि जेट विमान खरिद गरिने भएको समाचार ‘जनआस्था’ साप्ताहिकले प्रकाशित गरेको छ ।
समाचारअनुसार, विमान खरिदसम्बन्धी सैद्धान्तिक सहमति भैसकेको छ । श्री ५ को रद्द भएको संयुक्त राष्ट्रसंघको महासभामा भाग लिन न्युयोर्क सवारी हुने कार्यक्रमका क्रममा भएको बि्रफिङमा शाही उडानका लागि छुट्टै र नयाँ जहाजको आवश्यकता खड्किएको जानकारी श्री ५ समक्ष पेस गरिएको थियो । शाही नेपाल वायुसेवा निगमको बोइङ- ७५७ जहाज चार्टर गरेर भीभीआईपी उडान तयार गरिएकोमा उडानको समयसम्ममा पनि जहाज पूर्ण रूपले समस्याविहीन बनाउन नसकिएकाले शाही उडानका लागि छुट्टै जहाजको आवश्यकता महसुस गरिएको हो ।
‘जनआस्था’ लेख्छ— प्रधान सेनापति प्यारजङ्ग थापासहित उच्चस्तरीय टोलीले शाही उडानका लागि नयाँ जेटको आवश्यकतासम्बन्धी बि्रफिङ गरेपछि श्री ५ महाराजाधिराजले सहमति जनाइबक्सेको छ । शाही उडानका लागि बोइङ ७३७ जहाज किन्ने योजना बनेको छ ।
माओवादीसँगको लडाइँका क्रममा देशको ढुकुटीको धेरैजसो रकम सुरक्षाखर्चमै लगाउनुपरेको बेला दरबारको जेटका लागि भने शाही नेपाली सेनाको कल्याणकारी कोषको रकम खर्च गरिने भएको छ । कल्याणकारी कोषमा सैनिक जवानदेखि अधिकृतसम्मका सबैले विदेश मिसनमा जाँदा पाउने जम्मा पारिश्रमिकको निश्चित प्रतिशत रकम जम्मा हुन्छ । अरबौंको उक्त कोषबाट जेटका लागि रकम लिएपछि कोषलाई फाइदा हुने गरी सो जेटलाई व्यापारमा समेत लगाइने योजना छ ।
गृह पृष्ठ
Dhanya shree 5 gyanendra desh ko sampati rityau desh lai kangal banau
Comment by Anonymous — October 1, 2005 @ 9:00 am